Познатиот американски пејач, композитор и текстописец Нил Седака, автор на голем број популарни песни, почина на 86-годишна возраст. Веста за неговата смрт ја потврдија негови претставници, неколку часа откако бил примен во болница во Лос Анџелес. Причината за смртта засега не е објавена, пишува „Гардијан“.

Во соопштение, неговото семејство истакна дека изгубиле сопруг, татко и дедо, нагласувајќи дека светот останува без вистинска музичка легенда која инспирирала милиони луѓе.

Седака е роден во 1939 година и уште како дете покажал исклучителен музички талент. На само девет години добил стипендија за престижното музичко училиште Џулијард (Juilliard School) во Њујорк, каде првично се школувал за концертен пијанист. Подоцна го насочил својот талент кон поп-музиката и авторското создавање.

Како тинејџер започнал долгогодишна соработка со текстописецот Хауард Гринфилд, со кого создаде песни што го одбележаа музичкиот период на крајот од 1950-тите и почетокот на 1960-тите. Во тие години станал идол на младата публика, продавајќи повеќе од 25 милиони плочи и добивајќи номинација за престижната музичка награда Греми.

Неговата кариера привремено забавила со појавата на британскиот музички бран предводен од Битлси, кој целосно ја променил светската музичка сцена. Сепак, Седака повторно се вратил на врвот во следните години.

Тој остави силно влијание врз многу музичари, меѓу кои и Елтон Џон, со чија издавачка куќа соработувал во 1970-тите. Покрај сопствените хитови, пишувал песни и за бројни други изведувачи, а во 1973 година соработувал и со шведската поп-група АББА, за која ги напишал англиските стихови за песната „Ринг Ринг“ (Ring Ring).