Откако наставниците ќе ја почнат новата учебна година со истите непокачени плати, ВМРО-ДПМНЕ и СДСМ се обвинуваат меѓусебно за тоа кој е виновен за таквата состојба. Од владејачката партија коментираат дека протестот што СДСМ го организираше денеска бил фијаско, а од СДСМ возвраќаат дека единственото фијаско биле политиките на ВМРО-ДПМНЕ.

-Наставниците знаат дека СДСМ се лицемерни зашто во времето на нивното владеење кое заврши пред 2 месеци можеле да ги зголемат платите но не го направиле тоа. Денешниот собир на просветни работници пред МОН организиран од СДСМ е фијаско, смета ВМРО-ДПМНЕ и ветува дека покачување ќе има од март 2025 година.

Од СДСМ возвратија дека единственото фијаско биле погрешните политики на ВМРО-ДПМНЕ во сите сфери на почетокот од владеењето.

– СДСМ без помпа и слободно излезе денес да ги поддржи наставниците кои бараат повисоки плати кои ги заслужуваат. Притисоците кои го прави ВМРО-ДПМНЕ и навредите кон оние кои се противат на лошите политики се одраз на стравот од оние кои се надеваа на праведност и почит – просветните работници. Една од најважните области, образованието, Мицкоски и ВМРО-ДПМНЕ ја запоставија комплетно, а наставниците ги понижија, велат од СДСМ.

Оттаму додаваат дека иако ВМРО-ДПМНЕ во предизборието ветувале повисоки плати за наставниците, сега се сменила плчата.

-Иако им ветуваа поголеми плати на наставниците како опозиција, само што седнаа во фотелјите ја сменија плочата и сега велат нема пари. Тоа веќе не е фијаско туку се вика лажење. СДСМ 7 години ги покачуваше платите на наставниците дури и во ковид кризата и за време на енергетската криза. Секој септември се покачуваа платите на наставниците и кумулативно зголемувањето достигна 55 проценти. Мицкоски и ДПМНЕ го погазија достоинството на наставниците кои се клучна алка за подобар образовен процес на идните генерации. Доста се правдате и лажете по прес конференции од белиот дворец, земете работете и покачете ги платите на наставниците“, велат од партијата во реакција.