Пиронкова против Вилијамс во четвртфиналето на УС Опен (ВИДЕО)
Серена Вилијамс по 15 пат во кариерата се пласираше во четвртфиналето на „УС Опен“, совладувајќи ја грчката тенисерка Марија Сакари со 2:1 во сетови (6:3, 6:7, 6:3).
Американката направи брејк во првиот сет за предност од 4:2, подоцна и триумф со резултат 6:3. Во вториот сет се играше тај-брејк кој го освои Сакари со 8:6 во поени за израмнување. Интересен е податокот кој вели дека Сакари триумфираше годинава на сите досегашни тај-брејкови.
Можеше да направи и целосен пресврт на мечот, поведе со 2:0 во гемови во третиот сет, но потоа Вилијамс покажа зошто е една од главните фаворитки за титулата и по 53 пат се пласираше во четвртфиналето во еден од грен слем турнирите. На тој начин се израмни со Мартина Навратилова, и пред нив е само Крис Еверт со 54 пласмани.
За пласман во полуфиналето Вилијамс ќе игра против Цветана Пиронкова од Бугарија која ја елиминираше Елиз Корне (Франција) со 6:4, 6:7 (5) и 6:3.
Познати се уште две четвртфинални двојки во женска конкуренција, Бреди-Путинцева и Осака-Роџерс, а последната ќе ја дознаме по одигрувањето на осминафиналните дуели Азаренка-Мухова и Мертенс-Кенин.
Кај мажите денеска заврши мечот помеѓу Васек Поспишил и Алекс Де Минаур во кој подобар беше Австралиецот со 3:0 во сетови 7:6 (6), 6:3 и 6:2. Де Минаур во следната фаза ќе игра против Доминик Тим од Австрија кој со 7:6 (4), 6:1 и 6:1 го надигра Канаѓанецот Феликс Оже-Алијасим.
Познати се уште две четвртфинални двојки, Карењо Буста против Шаповалов, а Чориќ ќе ги одмери силите со А. Зверев. Последниот пар ќе го дознаеме по завршувањето на мечевите Беретини-Рублев и Тиафо-Медведев.