Влада Дивљан, пет години подоцна, и натаму е со нас преку безвременската музика која ја создаваше, преку нашите сеќавања на неговиот добар дух и начин на кој се однесуваше со пријателите, но и со сите луѓе кои ги познаваше, со што заслужено го носеше епитетот за „најголемиот џентлмен во рокенролот“, како што го нарече неговиот пријател и соработник Макс Јуриќиќ.

Минатата година 4.000 распеани луѓе во публиката и голем број на познати музичари учествуваа во белградскиот Сава центар на концерт посветен токму на единствениот Влада, клучната авторска личност на култните „Идоли“, под наслов – „Хајде сањај ме, сањај“, кој е одржан на неговиот 60 роденден на 10 мај, 2018 година.

Интересно е и тоа што документарецот за Влада Дивљан, кој е дело на Младен Матичевиќ, а го носи насловот „Небеска Тема“, покрај тоа што минатата година имаше распродадени премиери во Сава центарот и салата Лисински во Загреб, пред неколку дена доживеа и своја премиера во Њујорк.

Сето ова зборува и повеќе од доволно за значењето на ликот и делото на Влада Двиљан и тоа не само на балканско, туку и на светско ниво.

Барем неколкупати секој месец на некое место од просториите на поранешна Југославија се одржуваат различни настани посветени токму на овој пејач.

Покрај тоа што остави голем белег со „Идоли“, Дивљан имаше и импресивна соло кариера, а со својот карактеристичен глас испеа песни кои и денеска секојдневно ги слушаат илјадници луѓе на Балканот и пошироко.