Портпаролот на Кремљ, Дмитриј Песков, денес изјави дека Русија сè уште чека украинската страна да предложи датуми за нова рунда директни преговори.

Тој изјави дека Москва ќе ги објави договорените датуми штом ќе ги добие, објави ТАСС.

Песков потсети на претходните договори за размена на затвореници според формулата „1.000 за 1.000“ и враќање на тешко болни и млади затвореници.

Коментирајќи ги испораките на оружје за Украина од страна на САД и Европа, Песков оцени дека Западот го поддржува продолжувањето на конфликтот, наведувајќи дека испораките на оружје за Киев најверојатно не се насочени кон мирно решение, туку кон продолжување на воените операции.

Тој додаде дека постојат контрадикторни информации за количината на оружје што пристигнува во Украина.

Песков најави дека рускиот претседател Владимир Путин ќе го прими раководителот на „Росфинмониторинг“ Јуриј Чиханчин, кој ќе достави извештај за работата на службата за финансиско разузнавање.

Тој исто така рече дека Кремљ внимателно ќе ги следи информациите за новиот пакет санкции на Европската Унија против Русија, најавен како најстрог пакет од 2022 година, што би можел да влијае на приходите од нафта и финансиското работење на Русија.

Песков повтори дека ставот на Русија за санкциите е „добро познат“. Кога беше прашан за списокот на непријателски земји кон Русија, Песков изјави дека списокот не е догматски и дека може да се ревидира доколку се променат билатералните односи, но дека засега нема промени.

Зборувајќи за последиците од санкциите, Песков истакна дека Русија стекнала многу искуство во нивното минимизирање и дека „ќе продолжи да го користи тоа знаење“.

Русија, рече тој, високо ги цени напорите на американскиот претседател Доналд Трамп во обидите да го започне процесот на преговори со Украина и гледа потенцијал за обновување на трговските и економските односи со САД, вклучително и можноста за заеднички проекти. Песков оцени дека санкциите на САД против Русија се нелегални и дека им штетат на компаниите на двете земји.

Коментирајќи ја смртта на поранешниот руски министер за транспорт Роман Старовоит, Песков изрази шок и изјави дека истрагата е во тек и рече дека не е до Кремљ да шпекулира за околностите.