Периодот на Скопскиот џез-фестивал секогаш е празник
Периодот кога се случува Скопскиот џез-фестивал секогаш бил чувствуван како празник на музиката во Скопје. Ковид-кризата успеа да го намали бројот на присутната публика, но не и дигнитетот и реномето на најзначајниот музички настан во Скопје.
Со високи стандарди и строги начела Скопје џез-фестивал од 20 до 24 октомври се одржува во јубилејното 40-то издание.
Покрај врвните изведувачи што настапуваат на сцената, празникот ќе биде дополнет и со наградата за најдобар млад македонски џез-музичар, што Скопскиот џез-фестивал ја доделува веќе петта година.
Годинава наградата ќе оди во рацете на извонредно талентираниот скопски гитарист, композитор и импровизатор Филип Букршлиев. Наградата ќе му биде врачена в недела, во рамките на последниот фестивалски ден, во 17 часот во МКЦ – Кино „Фросина“.
(Текстот и фотографиите се објавени во „Културен печат“ број 102, во печатеното издание на весникот „Слободен печат“ на 23-24 октомври 2021)