Ракометарите на Еурофарм Пелистер не успеаја да обезбедат пласман во четвртфиналето во Лигата на Европа откако и во реваншот во Битола загубија од Нексе со 21:22 со што заврши европската одисеја на битолчани.

Хрватскиот тим успеа да го издржи притисокот од трибините, како и налетот на битолчани на стартот од натпреварот и со смирена игра успеаја да дојдат минимален триумф.

– Сакам да му честитам на Нексе за заслужената победа и што славеа на двата меча. Видовме еден одличен ракомет, но ние не успеавме да ги искористиме шансите, а противникот ги казни сите оние „црни дупки“ што ги имаме. Највеќе ми е жал што загубивме пред нашата публика, мислам дека тоа е она кое најмногу нас не боли. Мора да ги заборавиме овие порази бидејќи немаме време за жалење, затоа што чекаат домашните предизвици – изјави Периќ на прес-конферецијата по натпреварот.

Помошникот на тренерот Жељко Бабиќ, Божидар Мојсов пак смета дека пеколниот ритам си го направи своето.

– Им честитам на ракометарите на Нексе за победата и им посакувам многу успех и пласман на фајнал-фор. Што се однесува до нас, одигравме тежок натпревар. Но, играчите беа исцрпени, бидејќи одигравме пет натпревари за девет дена. Не успеавме да се опоравиме, но што е тука е, Нексе беше подобар кога беше потребно и тука ја испуштивме шансата. Благодарност до навивачите, заслужија барем победа. Сега се фокусираме на тоа што ни претстои, а тоа е да ја донесеме титулата во Битола – рече Мојсов.

.