Пакистан ги продолжува разговорите со Авганистан за да се стави крај на најлошиот конфликт меѓу двете соседни земји откако Талибанците се вратија на власт во 2021 година, соопшти портпаролот на пакистанското Министерство за надворешни работи.

Портпаролот истакна дека високи претставници од двете земји учествувале во разговорите во северозападниот кинески град Урумки, објави Ројтерс.

Разговорите започнаа откако двете страни ја прифатија понудата на Кина за медијација и е предвидено да продолжат во наредните денови.

Средбата во Урумки следеше по посетата на пакистанскиот министер за надворешни работи Ишак Дар на Пекинг, каде што тој и неговиот кинески колега Ванг Ји разговараа и за пошироки регионални прашања и дипломатски напори.

Пакистан го обвинува Авганистан дека им обезбедува засолниште на екстремистите, особено пакистанските талибанци, кои вршат напади од негова територија, обвинение кое го негираат властите во Кабул.

Судирите, кои ескалираа кон крајот на февруари, претставуваат најлошо насилство меѓу двете земји во последните децении.