На тендерот на Агенцијата за електронски комуникации (АЕК) за доделување одобрение за нов мрежен оператор, единствена понуда достави „Оне Македонија телекомуникации“, фирма во сопственост на унгарската „Фор-ај-џи“.

Комисијата за спроведување на тендерот денеска, на отворањето на понудите во АЕК, констатираше дека компанијата доставила целосна документација.

„Постапката ќе продолжи согласно законот. Следува евалуација на документацијата, по што ќе се изготви извештај,“ изјави претседателот на Комисијата, Игор Бојаџиев.

Бидејќи се распишани локалните избори, одлуката, доколку сè е во ред, ќе биде донесена по завршување на изборниот процес.

Иако тендерска документација за трет мобилен оператор подигнале три компании, на крај понуда доставила само една. Според условите, потенцијалниот нов оператор во земјава треба да започне со работа на крајот на 2026 година.