Ракометарите на Охрид ставија точка на првиот дел од сезоната во Суперлига на Македонија со убедлива и сигурна победа над Пролет од 39-23.

Домашниот состав уште од самиот старт покажа дека нема да дозволи изненадување. Со цврста одбрана и разигран напад, „гладијаторите“ постепено ја градеа предноста, па на пауза заминаа со сигурни плус седум (16-9). Пролет се обидуваше да фати резултатски приклучок, но немаше решение за расположените охриѓани.

Во второто полувреме темпото дополнително се засили, а мрежите често се тресеа на двете страни. Сепак, квалитетот и подолгата клупа на Охрид дојдоа до израз, па разликата постојано растеше сè до конечните плус 16.

Најрасположен на теренот беше Давид Савревски кој блесна со 10 погодоци. Кај гостите од Скопје, по петпати прецизни беа Горазд Дамчевски и Никола Стоилевски, но нивниот учинок беше недоволен за порамноправна битка.