Денешното судско рочиште за случајот со претепувањето на секретарот на здружението „Цар Борис Трети“ во Охрид, Кристијан Пендиков е одложено за 31 октомври, објави БТА.

На денешната седница на Основниот суд во Охрид требаше да бидат сослушани сведоците на одбраната на обвинетите Илија Спасески и Борче Ангелов. Наместо тоа, нивниот адвокат Димитрија Цобоски на обвинителот и на судијата им достави диск со доказите на одбраната во случајот.

Обвинителката во случајот Викторија Коваческа-Мандулоска побара да ги види доказите за кои рече дека требало да бидат изведени осум дена по претходното рочиште во јули. Судијата мора да ја прегледа и содржината на дискот за да размисли дали да го признае како доказ во случајот.

Тој ќе одлучува и за барањето на адвокатот на Спасески и Ангелов, судот од обвинителството во Охрид да побара информација дали против Пендиков се води претходна постапка за поседување дрога. Цобоски изјави дека кога побарал информација од МВР-Охрид и од градското обвинителство, добил одговор дека не е странка во случајот и затоа нема причина да бара таква информација.

На прашањето на судијата каква е врската на бараната информација со случајот со тепањето, адвокатот наведе дека со тоа ќе стане јасно дали причината за тепањето е таа наведена во обвинителниот акт.

Илија Спасески и Борче Ангелов се обвинети дека „од омраза“ му нанеле тешка телесна повреда на Кристијан Пендиков во вечерните часови на 19 јануари 2023 година, на прославата на Богојавление Водици.