Во основното училиште „Димитар Миладинов“ обновена се свечената и фискултурната сала. Притоа, како што информираат од Општина Центар, во фискултурната сала е реконструиран подот, поставен е нов паркет, обновени се ѕидовите и покривната внатрешна површина, поставени се нови прозорци, обележан е спортскиот терен, а ставено е и ново енергетски ефикасно осветлување.

Во свечената сала, на површина од 300 м², саниран е паркетот, ламинатот на бината е заменет со паркет и поставени се нови скали. Реконструирани се ѕидовите, а поставени се и четири нови прозорци. Вградено е енергетски ефикасно осветлување.

Создаваме современи и безбедни простори за настава, спорт и рекреација. Реконструкцијата на фискултурната сала е поттик за младите да бидат физички активни, што е важно за нивниот развој, истакна градоначалникот Горан Герасимовски, кој денеска направи увид на реконструираните простории.

Градоначалникот нагласи дека во новата програма се предвидува и реконструкција на базенот во училиштето, со што ќе се подобрат условите за спорт.