Нови факти за творештвото на Григор Прличев во монографијата „Прличеви беседи – хроника на еден културен настан“
Националната установа Библиотека „Григор Прличев“ на традиционалната манифестација „Прличеви беседи“ ја промовираше монографијата „Прличеви беседи – хроника на еден културен настан“ (1952-2022) од авторите Милчо Јованоски и Гордана Змејковска.
Библиотеката „Григор Прличев“ со монографијата ја одбележа 70-годишнината од почетокот на манифестацијата „Прличеви беседи“ во Охрид.
– Основа, да почнеме и да продолжиме со истражувањето ни беше првата монографија од авторот Маринела Јовановиќ, која го опфаќа периодот од 1952 година заклучно со 1996 година. Нејзини издавачи се: Градската библиотека „Григор Прличев“, Радио Охрид и книгоиздателството „Мацедониа Прима“.
Ние, како автори, продолживме таму каде што се застанало и преку документи, фотографии и искажувања се надеваме дека како наш залог за идните генерации уште еднаш ги зацврстивме историските и развојните факти, за седумте децении и посебно за последните 25 години сврзани со настаните од „Прличевите беседи“ одржани во нашата матична библиотека, која со гордост го носи името на својот Патрон – Григор Прличев.
Концепциски, оваа монографија е збогатена со сеќавања и беседи за Прличев од наши и странски писатели и поети. На површина излегуваат нови факти и нешта кои до денеска не сме ги знаеле или не биле доволно разјаснети. Монографијата не е само гола фактографија на настани и хроника, туку содржи и низа стручни елементи и научни истражувања кои „шетаат“ во длабочина и широчина низ животот и творештвото на преродбеникот Прличев – објаснуваат авторите Јованоски и Змејковска.
(Текстот е објавен во „Културен печат“ број 116, во печатеното издание на весникот „Слободен печат“ на 12-13 февруари 2022)