Седум мутации се појавија во сојот Х3Н2 на сезонскиот грип, што довело до „брзо зголемување“ на извештаите за мутираниот вирус, вели проф. Дерек Смит, директор на Центарот за еволуција на патогени на Универзитетот Кембриџ.

Грипот погодува милиони луѓе секоја зима, но се чини дека ова лето се случило нешто необично. Сезонскиот вирус на грип неочекувано мутирал во текот на летото. Се чини дека заобиколува дел од нашиот имунитет, ја започнал сезоната на грип повеќе од еден месец порано и станува збор за тип на грип за кој историјата сугерира дека е посериозен.

Затоа, Британската национална здравствена служба (НХС) издаде итен апел за вакцинирање против грипот, бидејќи расте стравот дека би можело да нè очекува тешка зима. Постојат многу нијанси и неизвесности, но водечките експерти за грип велат дека не би ги изненадило ако ова биде најлошата сезона на грип во последната деценија.

„Долго време не сме виделе вирус со вакви карактеристики, оваа динамика е невообичаена. Апсолутно ме загрижува. Не паничам, но загрижена сум“, рекла проф. Никола Луис, директорка на Светскиот центар за грип при Институтот Франсис Крик.

Научниците ја следат еволуцијата на вирусите на грип бидејќи тие постојано мутираат, а сезонската вакцина против грип мора да се ажурира секоја година за да биде ефикасна. Оваа еволуција следи ритам познат како „shift i drift“. Поголемиот дел од времето, вирусот се менува бавно, а повремено доаѓа до ненадејна, значајна мутација. Тоа се случи во јуни оваа година, пишува „Би-би-си“.