Издавачката куќа „Метаноја“ на 27 ноември, во 19 часот, организира промоција на своето најново издание со наслов „Дијалози за слободата“ во авторство на новинарот и публицист Љупчо Јолевски.

Во книгата се забележани четириесетина разговори со исто толку современи македонски визуелни уметници работени во периодот пред, за време и по пандемијата. Годините кои по многу нешта го изместија нашето живеење, моментите на преиспитување на нашите поимања на опстојбата и потребата да се креира еден вид отпор и жед за лет, и конечно ја потврдија идејата за слободата како врвен дострел.

Настанот ќе го отвори директорката на „Метаноја“ Нада Милкова, а за книгата ќе говорат Коста Милков и Маја Чанкуловска-Михајловска. За своето дело на публиката ќе ѝ се обрати и авторот Љупчо Јолевски.

Промоцијата на книгата „Дијалози за слободата“ ќе се одвива во амбиент на изложените дела од поставката „Лица“ на Здружението за култура „Транзен“, а на домашната ликовна публика по првпат заедно ќе ѝ ја дари изложбата „Живот за уметноста“ на Александар и Ивана Настески, известија од „Метаноја“.