Премиерот Христијан Мицкоски и министерот за економија и труд Бесар Дурмиши на денешната прес-конференција во Владата соопштија дека турската компанија за производство на автоделови „Џаво Отомотив“ ќе гради фабрика во индустриската зона во Тетово, а инвестицијата треба да отвори околу 500 нови работни места.

– Станува збор за браунфилд-инвестиција, која ќе почне со закуп на постоен објект од 8.000 квадратни метри, а капацитетите ќе се прошируваат до 21.000 квадратни метри до 2028 година. До 2030 година компанијата планира да иневстира речиси 21 милион евра. Целокупното производство на контролни кабли од Турција и Словачка ќе се реализира во Тетово, што е потврда за довербата на инвеститорот во македонската економија, нашата работна сила и деловната клима – рече Мицкоски.

Тој вели дека овој инвестициски проект ќе значи зголемен извоз, трансфер на нови технологии и дополнителна додадена вредност за македонската економија.

-По иницијалните преговори, кои траеја повеќе од една година, денес се испраќа јасна порака – дека Македонија и натаму е атрактивна дестинација за странските инвеститори – рече министерот Дурмиши.

Годишниот извоз од новата фабрика се проценува на околу 45 милиони евра. Мултинационалната корпорација „Џаво отомотив“ работи во индустријата за автомобилска опрема, дизајнира и произведува безбедносни производи, како и разни механизми и оперативни кабли за многу водечки производители на автомобили. Освен во Турција, компанијата е присутна и во Канада, Германија и Словачка.

СДСМ го откажа традиционалниот марш за 8 Март, ќе се приклучи на протестот „Нема да не снема“