Во Германија повеќе од четири милијарди евра наводно лежат на таканаречени „заборавени сметки“ во банки и други финансиски институции, објави Сојузното министерство за истражување, технологија и вселена уште во 2021 година. Можно е да станува збор за уште поголема сума – некои други проценки дури споменуваат и до девет милијарди евра. Самите банки досега не објавиле никакви бројки, пишува DW.

Во случај на смрт, честопати не е лесно за членовите на семејството и наследниците да пронајдат такви сметки, особено затоа што многу луѓе имаат повеќе сметки. Средствата се особено тешки за откривање кога нема писмени документи или печатени изводи од сметки со онлајн банкарство, бидејќи информациите се чуваат во е-пошта, на сметки или во компјутери. Атипични средства како криптовалути или NFT се уште потешки за следење.

Во Германија не постои официјална дефиниција за вакви сметки. Напуштени, заборавени или неактивни сметки, кога станува збор за традиционални финансиски средства, најчесто се банкарски депозити или хартии од вредност – како што се акции и обврзници – каде што немало активност долго време. Ваквите сметки можат да останат неактивни со години.

Со оглед на тоа што не постои законска регулатива, справувањето со ваквите сметки во голема мера им е оставено на самите банки. Повеќето институции ги сметаат неактивните сметки ако сопственикот на сметката починал и не е можно да се утврдат наследниците, ако нема контакт со сопственикот со години, поштенските пратки се враќаат, а другите контакт информации се застарени.

Провизиите „горат“- за водење на сметка во банка 35 денари месечно, за плаќање сметка на шалтер 50 денари

Неактивните сметки во Германија не стануваат сопственост на банките, ниту се пренесуваат на државата. Банките се должни да ги одржуваат таквите сметки на неодредено време, а правата на сопственост – без разлика дали се на оригиналниот сопственик или на неговите наследници – не истекуваат. Средствата од сметката може да ги побара германската држава само ако е утврдена како наследник според законот за наследување. Врз основа на правилата за имот без сопственици, сметката не може да ѝ припаѓа на државата.