Никој да не биде „колатерална штета“ на пушачите, бара Институтот за медицина на трудот
Институтот за медицина на трудот го поддржува новиот предложен Закон за заштита од пушењето кој предвидува целосна забрана за пушење во сите затворени јавни и работни простории.
Препорачано
-Оваа забрана не е рестриктивна мерка, туку основен здравствен стандард и човеково право. Секој работник има неприкосновено право на чист воздух и работно место кое не го загрозува неговото долгорочно здравје. Нагласуваме дека работниците во угостителскиот сектор, се меѓу најранливите групи. Овие вработени често се изложени на високи концентрации на тутунски чад во текот на целото работно време, кое често надминува 8 часа дневно. За овие работници, „пасивното пушење“ не е избор, туку претставува сериозен здравствен ризик кој потекнува од нивното работно место. Научните докази се јасни: не постои „безбедно“ ниво на изложеност на чад или аеросоли од тутунски и никотински производи. Пасивното пушење е докажана причина за сериозни респираторни и кардиоваскуларни заболувања, вклучувајќи го и ракот на белите дробови, дури и кај непушачите. Наша должност како јавно-здравствена установа е да обезбедиме ниту едно лице да не биде „колатерална штета“ на туѓа навика додека ги извршува своите професионални обврски, велат оттаму.
Институтот ги повикува работодавачите, особено во угостителството, да ја поддржат примената на законот како мерка за безбедност при работа, а не како „казна“, работниците да го препознаат правото на чист воздух како дел од правото на безбедно работно место, а инспекциските и надлежните органи да обезбедат доследна примена, затоа што само така законот ќе ја исполни својата цел.
Со спроведувањето на овие мерки, не само што ги штитиме поединците, туку и ја зајакнуваме нашата економија преку намалување на боледувањата и продолжување на животниот век на нашата работна сила. Институтот за медицина на трудот цврсто стои зад овој закон. Јавното здравје и безбедноста на нашите работници мора секогаш да имаат предност пред комерцијалните интереси. Повикуваме на поддршка од сите чинители за оваа транзиција кон почиста, поздрава и попродуктивна работна средина за сите работници во нашата земја, пишува во соопштението од Институтот.
„Двајца без тројца“ инспектори ќе треба да го спроведат Законот против пушењето
