Преку телефонски повик од кабинетот на Премиерот и без никакво образложение, во текот на вчерашниот ден додека била на своето работно место, директорката на Државниот архив на Македонија професорката Наташа Котлар Трајкова била разрешена од функцијата која ја извршуваше една година и четири месеци.

Во изјава за телевизијата „24“, Котлар Трајкова рече дека според неа, поводот поради кој е разрешена е едно нејзино интервју во август, во кое изнела критички став за македонските иселеници во Австралија.

„Од вчера, точно во 12 часот и 4 минути, јас бев на моето место во Државен Архив на Република Македонија, ми се јави една госпоѓа која се претстави дека се јавува како секретарка од кабинетот на премиерот. Информацијата беше многу кратка, со тоа што ме извести дека од моментот на јавување јас веќе нема да бидам директор на Државниот Архив. Дознав во една комуникација со претседателот дека фактички мојот најголем грев и поводот за моето менување е изнесено критичко мислење во едно интервју што го дадов во август месец за нашите иселеници во Австралија“, вели сега веќе поранешната директорка.

Според Котлар Трајкова, дополнителна причина за нејзиното разрешување било и тоа што назначениот заменик-директор од редовите на ВМРО-ДПМНЕ, како што рече, имал амбиција да премине на директорската позиција.

На локалните избори во 2021 година, Наташа Котлар Трајкова беше кандидат за градоначалник на општина Центар од редовите на ВМРО-ДПМНЕ.