Германската полиција вчера пронајде тела на пет деца во зграда во Золинген, град во западна Германија. Според тамошните медиуми, 27 годишна мајка отрула пет од своите шест деца пред да се обиде да се самоубие со фрлање под воз во Дизелдорф. Полициски извори соопштија дека децата биле отруени со апчиња. Меѓу починатите деца, три се девојчиња на возраст од една и пол, две и три години и две момчиња на возраст од шест и осум години.

Шестото и највозрасно дете, момче на возраст од 11 години е живо, на безбедно и згрижено од роднини. Локалните медиуми јавуваат дека тој со својата мајка тргнал кон железничка станица во посета на бабата, но мајката во еден момент излегла на станицата во Дизелдорф и скокнала под воз.

Полицијата соопшти дека бабата се обидела да стапи во контакт со нив околу 14 часот и по неколкуте неуспешни обиди се  упатила кон станот во Золинген. Самите работници од службите за итни случаи биле трауматизирани од глетката што ја нашле во станот. Тие се обиделе да ги реанимираат децата, но било предоцна. Засега е нејасно дали преживеаното дете било сведок на настаните во станот.

Портпаролот на полицијата, Штефан Вејанд, рече дека станува збор за трагична ситуација и додаде дека мајката закрепнува и сè уште не е во можност да биде испрашувана.

„Не знаеме како и зошто се случи ова страшно злосторство“, изјави Вејанд за локалните медиуми.