Низ државата оваа недела ќе има засилени радарски контроли од страна на МВР, како дел од европската акциска контрола која ја спроведуваат сите членки на Европската мрежа на сообраќајни прекршоци – РОАДПОЛ.

-Од 13 до 19 април стартува европската акциска контрола на брзина на патиштата. Македонската сообраќајна полиција како членка на Европската мрежа на сообраќајни полиции – ROADPOL се приклучува на акциската контрола со зголемени контроли за возење над дозволената брзина- велат од Министерството.

Акцијата ќе трае до 19 април, а од вечерва на полноќ МВР најави 24-часовен радарски маратон, со што се очекува македонските сообраќајници да бидат „преплавени“ со радарски контроли, кои ќе се спроведуваат во текот на целото деноноќие.

-Од среда, 15 април од 00.00 часот до четврток 16 април 00.00 часот ќе биде 24-часовен Маратон на брзина и во тој период ќе има непрекинати акциски контроли на брзината на движење на територијата на целата држава – најавија од МВР.

Сепак, оттаму додадоа дека локациите на акциските контроли им се однапред познати за возачите, бидејќи, како што велат од МВР, целта на оваа акција не е казнување, туку безбеден сообраќај.

-Голем дел од локациите на акциските контроли им се однапред познати на возачите со цел да се засили превентивниот карактер на акциите. Целта не е казнување, целта е сообраќај во рамките на обележаните брзини, сообраќај кој спасува животи – соопштија од Министерството.

Како што велат од МВР, РОАДПОЛ маратонот за брзина е заедничка акциска контрола на сите европски сообраќајни полиции која се изведува истовремето на сите европски патишта.