Новогодишните и божиќните празници треба да бидат време на радост, но често се претвораат во вистински кошмар за сопствениците на домашни миленици. Благодарение на грубите и невнимателни луѓе кои фрлаат петарди како да се работи за некоја посебна сензација, животните се трауматизирани и дури може да доживеат срцев удар од страв. Затоа апелирајте до луѓето околу вас да не фрлаат петарди бидејќи има многу подобри и побезбедни начини да ја дочекате Новата година.

Времето на новогодишните празници и зимската забава со петарди и огномети е и време кога најчесто се губат домашните миленици. Затоа, треба да обрнете посебно внимание и да не ги пуштате кучињата од поводникот неколку дена додека не помине опасноста. Следниве неколку совети ќе ви помогнат да ја осигурате безбедноста на вашето домашно милениче.

За мачки

– Чувајте ја вашата мачка во станот/куќата и не дозволувајте ѝ да излезе надвор.

– Затворете ги сите прозорци и навлечете ги завесите, а во периодот кога се слушаат петарди или огномет, засилете ја музиката или вклучете го телевизорот, за звуците што доаѓаат однадвор да бидат помалку чујни.

– Пуштете ја да побара засолниште во некој скриен агол од куќата ако тоа го сака – под креветот, зад каучот или плакарот. Не обидувајте се да ја намамите надвор и никогаш не преместувајте го мебелот за да дојдете до неа, бидејќи тоа може да предизвика само поголем стрес. Оставете ја мачката да се сокрие, а таа сама ќе излезе од своето засолниште кога ќе процени дека нема „опасност“.

– Доколку планирате да ја дочекате Новата година надвор од дома, оставете го домашното милениче во делот од куќата во кој е безбеднo, затворете ги сите прозорци, навлечете ги завесите и оставете го вклучен телевизорот или радиото, за надворешна бучава да се слуша што е можно помалку.

За кучиња

– Обезбедете му на вашето домашно милениче прошетка и рекреација во текот на денот. Избегнувајте да го пуштате без поводник.

– Никогаш немојте да го шетате кучето во време кога надвор ќе слушнете петарди или звук на огномет. Многу кучиња се мошне исплашени од овие звуци и во паника може да се отргнат од поводникот, да побегнат и да се изгубат. Ова е најчестиот начин да изгубите домашно милениче за време на новогодишните празници.

– Не го оставајте вашето куче само надвор без надзор, дури и ако дворот е добро ограден, а кучето врзано. Животното може да се испаничи, да го искине синџирот и да побегне или може да се повреди или да се задуши ако се заплетка во синџирот.

– Исто како и во случајот со мачките, затворете ги сите прозорци и навлечете ги завесите, а во периодот кога се слушаат петарди и огномети, засилете ја музиката или вклучете го телевизорот, за звуците што доаѓаат од надвор да бидат помалку чујни.

– Дозволете му на кучето да побара засолниште под креветот или во аголот на собата доколку сака.

– Ако вашето куче е особено склоно на стрес поради бучавата предизвикана од петарди и огномети, разговарајте со вашиот ветеринар за можности за седација. Никогаш не давајте на вашето домашно милениче седативи (како и други лекови) на своја рака, без претходно да се консултирате со ветеринар!

– Доколку планирате да ја дочекате Новата година надвор од домот, оставете го домашното милениче во безбеден дел од куќата, затворете ги сите прозорци, навлечете ги завесите и оставете го вклучен телевизорот или радиото, за надворешната бучава да се слуша што е можно помалку.