Американскиот носач на авиони „Џералд Р. Форд“, кој беше распореден во американско-израелските напади против Иран, утринава се закотви во хрватското јадранско пристаниште Сплит, поради поправки и одржување, пренесува Ројтерс.

Носачот на авиони, кој е најновиот американски и најголемиот носач на авиони во светот, дејствуваше во Црвеното Море како поддршка на американско-израелските напади врз Иран, но на 12 март Пентагон соопшти дека избувнал пожар во главната перална, при што биле повредени тројца морнари.

Тогаш речиси 200 морнари беа третирани и поради проблеми поврзани со чад, изјави американски официјален претставник во тоа време. Пожарот беше ставен под контрола со часови и имаше влијание врз околу 100 места за спиење.

Воениот брод е распореден девет месеци, а учествуваше и во операции против Венецуела на Карибите, пред да пристигне во Медитеранот.
Тој имаше и проблеми со канализацијата, кои зафатија 650 тоалети.

„Форд“ привремено застана во заливот Суда на грчкиот остров Крит. Владата на Хрватска, која е сојузник на САД во НАТО, го одобри неговото пристигнување неделава.

Од американската амбасада во Хрватска соопштија дека при престојот на носачот на авиони во Сплит, закажани се средби со хрватските лидери.

„За време на својата посета, бродот „УСС Џералд Р. Форд“ ќе биде домаќин на локални претставници и клучни лидери за да го потврди силниот и траен сојуз меѓу САД и Хрватска“, се вели во соопштението на амбасадата на САД во Хрватска.

Носачот на авиони, со повеќе од 5.000 морнари, има повеќе од 75 воени авиони, вклучувајќи борбени авиони како Ф-18 Супер Хорнет и софистициран радарски систем за контрола на воздушниот сообраќај и навигација.