Ниту казни, ниту блокирање на тркалата, па дури ни„пајаците“ не ги спречуваат некои од граѓаните да си ги паркираат возилата каде ќе им текне. Само во Центар, на територијата што е во надлежност на ПОЦ, секоја седмица бројот на казнети граѓани кои непрописно ги паркирале автомобилите и со тоа го попречувале нормалното и безбедно одвивање на сообраќајот се искачува и над 2оо.

Во периодот од 15.07. до 21.07.2024 година, со помош на специјалните возила „пајак“ на ЈП ПОЦ отстранети се 96 непрописно паркирани возила, а со поставување на механичко средство „блокатор“ санкционирани се 110 возила кои биле затекнати на резидентни паркиралишта, а не биле корисници-резиденти на секторот во којшто биле паркирани – соопштуваат од ЈП „Паркинзи на Општина Центар.

За трајно решение на сообраќајниот метеж и проблемот со неправилното паркирање неопходна е поголема сообраќајна култура, затоа, како што најавуваат од ПОЦ, нивните екипи заедно со полицијата и во наредниот период ќе продолжат со секојдневно отстранување на сите непрописно и несовесно паркирани автомобили во Центар со цел да се подигне сообраќајната свест на повисоко ниво и да се зголеми безбедноста во сообраќајот.