Во издание на Општина Охрид е објавена книгата „Библиографски портрет – Славе Ѓорѓо Димоски“, која ја приреди Даниела Спироска.

Во книгата е опфатена неговата активност на полето на литературата од првата објава 1975 година во гимназиското гласило „Јужен бран“ па сѐ до последните објави во 2025 година.

Внимателно, преку различни објави, е проследен неговиот развој на полето на литературата и културата. Книгата е составена од четири дела: Првиот дел се однесува на посебно печатени книги, први објави на македонски јазик, преведени книги на други јазици, преведени книги од други јазици, книги на Брајово писмо итн. – сѐ она што е објавено во форма на книга; вториот дел ја опфаќа целокупната критичка библиографија на поетот, како и интервјуа систематизирани хронолошки според годините и поводите на објавувањата.

Третиот дел се однесува на библиографски единици објавувани во домашни и странски весници и периодика, додека четвртиот дел ја заокружува книгата со индекс на целокупното поетско творештво подредено по азбучен ред, со поетски календар во кој се наведени неговите поетски средби и дружења во Македонија и во светот и завршува со список на добиени домашни и странски награди и куса библиографска белешка.

За изработка на овој „Библиографски портрет“ е користена личната архива на поетот, архивски материјали од НУБ „Свети Климент Охридски“ – Скопје и НУ Библиотека „Григор Прличев“ – Охрид. Книгата опфаќа над 1.500 библиографски единици.