Македонскиот театарски, филмски и телевизиски актер Никола Ристановски е роден на денешен ден, 23 јануари, во 1969 година. Денеска тој го одбележува својот 57. роденден.

Ристановски е роден во Острава, тогашна Чехословачка, а на седумгодишна возраст со семејството се преселил во Тетово. Уште во средношколските денови покажал интерес за глумата, како член на драмската секција, каде што го направил и својот прв значаен исчекор на сцената. Пресуден момент за неговата определба за актерската професија било учеството на натпревар во Осиек, Хрватска, каде што со претставата „Злосторство и казна“ од Фјодор Достоевски освоил прва награда од жири-комисија предводена од Фабијан Шоваговиќ.

Иако трипати бил одбиен на приемните испити, а подоцна се соочил и со тешкотии за време на студиите, Ристановски дипломирал на Факултетот за драмски уметности во Скопје во 1993 година, на отсекот за глумечка игра. Веќе како студент добил ангажман во театарска претстава, што се сметало за јасно признание за неговиот актерски потенцијал.

Професионалната кариера ја започнал во Македонскиот народен театар во 1994 година. Неговата прва улога била во претставата „Жорж Данден“, по што следеле бројни значајни сценски проекти. Посебно место во неговата кариера има култната претстава „Буре барут“, со која остварил над 150 настапи и стекнал широка препознатливост. Во текот на својата кариера, Ристановски има одиграно над 40 театарски улоги и настапено во повеќе домашни и странски филмски продукции.

Покрај театарот, тој оставил силен белег и во филмот и на телевизија, со улоги во остварувања како „Збогум на 20. век“, „Ова не е американски филм“, „Балканот не е мртов“, „Ослободување на Скопје“, „Монтевидео, Бог те видео“, како и во телевизиските серии „Сенки над Балканот“ и „На терапија“. Дел од неговата кариера е поврзана и со меѓународни проекти, особено со настапи во театарски продукции во регионот.

Со повеќе од две децении активна работа и голем број награди, Никола Ристановски важи за еден од најнаградуваните и најпрепознатливи македонски актери.

Наградата за најдобар актер, повторно во рацете на Никола Ристановски