МОН: Најголемите критичари денес во минатото најмногу доцнеа со набавките на учебници
Политичките субјекти кои денеска најмногу критикуваат дека се доцни со набавката и испораката на учебниците за основците и средношколците, всушност најмногу ги кочеа овие процеси кога во минатото раководеа со Министерството за образование и наука. Добро е да им ја освежиме меморијата дека токму пред 10тина години, кога нивни кадри управуваа со министерството, договорите за набавка на учебници беа склучувани после два-три месеци од отпочнувањето на учебните години, соопштија денеска од Министерството за образование и наука.
Оттаму ги презентираа договорите со издавачките куќи за откуп на учебници за основното и средното образование за учебната 2013-2014 година. На фотографиите се гледа дека се потпишани на 29ти, 30ти и 31ви октомври, како и на 4ти ноември 2013 година.
„За разлика од тогаш, денешното раководство на МОН и на другите надлежни институции во врска со набавката на учебници, сите надлежности ги преземаат навремено, многу порано од почетокот на една учебна година. Учениците, најголем дел од учебниците ги добиваат пред 1 септември, а мал дел во текот на септември. Нивното доцнење е поради тоа што постапките за нивна изработка и одобрување се пролонгирани од фактори на кои не може да се влијае институционално, односно не зависат од министерството. Наместо манипулации со јавноста, потребна е искреност кон граѓаните и најважно, поддршка на заложбите за градење на квалитетно образование. Оние кои се занимаваат со креирање на лаги и шпекулации, време е да почнат да даваат конкретни и конструктивни идеи за модернизација на воспитно – образовниот процес, а ние остануваме отворени за соработка, дискусија и прифаќање на секој предлог кој е изводлив и може да придонесе кон остварувањето на целта“,велат од МОН.