Компаниите „Крокс“ и „Лего“ ги здружија силите и претставија заеднички производ – правоаголни кломпи со назив „Лего коцка кломпа“ (LEGO Brick Clog), кои веќе предизвикаа големо внимание и реакции на социјалните мрежи, пишува „Блумберг“.

„Крокс“ и „Лего“ најавија глобално, повеќегодишно партнерство, осмислено како прослава на индивидуалноста, боите и креативноста. Првото издание веднаш го привлече вниманието на јавноста: „Лего коцка кломпа“, смел и необичен дизајн кој ја претвора препознатливата силуета на „крокс“ во впечатлива црвена лего коцка што може да се носи.

Кломпите во ограничено издание ќе се појават во продажба на 16 февруари и ќе чинат 150 долари. Секој пар колекционерски обувки доаѓа и со лего мини-фигура, заедно со четири пара минијатурни „крокс“ кломпи.

Главната директорка за маркетинг во компанијата „Крокс“, Карли Гомез, изјави дека безграничната имагинација на „Лего“ совршено се вклопува со „чудесно необичниот“ дух на „Крокс“. Таа истакна дека компанијата се гордее со тоа што е поинаква, што го слави самоизразувањето и ја поттикнува креативноста, додавајќи дека со нетрпение очекува обожавателите да видат што ќе создадат заедно.

 

View this post on Instagram

 

A post shared by Sneaker News (@sneakernews)

Музичарот Томи Кеш беше првата позната личност која се појави во овие кломпи, на модната ревија на „ЕгноЛаб“ за време на Модната недела во Париз, при што видно се сопнуваше додека се обидуваше да се прилагоди на нивната големина.

Тој ги комбинираше кломпите со црно одело покриено со лего коцки и носеше црвена роза направена од коцки.

Кломпите во форма на лего коцка се изработени од истата гумено-пластична пена како и останатите модели на „Крокс“, а ѓонот е дизајниран така што потсетува на долната страна на класична лего коцка.