Македонската машка ракометна репрезентација до 20 години го забележа и вториот пораз на Европското првенство, откако денеска беше поразена од Хрватска со 34:29.

По поразот од Норвешка во првото коло (пет голови разлика), младите македонски ракометари повторно не успеаа да избегнат негативен резултат. Клучната разлика беше создадена во првото полувреме, кое Хрватите го добија со 19:14.

Во продолжението Македонија одигра рамноправно со противникот, но не успеа значително да ја намали негативата. Хрватска сигурно ја контролираше предноста и на крајот славеше со конечни 34:29.

Најефикасен во македонскиот состав беше Марко Каевски со седум погодоци, додека Бобан Поповски натпреварот го заврши со шест голови.

Со вториот пораз во групната фаза, Македонија остана без шанси за пласман меѓу 12-те најдобри селекции на шампионатот. Во последното коло нашите ракометари ќе се соочат со Данска, а натпреварот е закажан за 11 јули.