Млади битолски музичари наградени во Белград
Од 14 до 20 март во Белград се одржа 20-от меѓународен музички натпревар „Даворин Јенко”. Натпреварувачите беа поделени во различни категории во зависност од нивната возраст. На овој натпревар во дисциплината Клавир Соло учествуваа и ученици од Државното музичко училиште во Битола, кои одлично ги покажаа своите пијанистички вештини и со тоа уште еднаш докажаа дека ова училиште на сите натпревари во државава и странство секогаш ги освојува највисоките места и постигнува одлични резултати, објави локалната телевизија „Тера“.
Жири комисијата беше во состав: Катарина Крпан, Драгомир Братиќ, Радојка Ивановиќ, Џулијано Адорно, Наташа Митровиќ, Гоара Нона Лазиќ и Марија Максимова, во различни категории за клавир и клавирско дуо.
Во изминатите години, меѓународниот натпревар „Даворин Јенко“ кој го носи името по српско-словенечкиот композирот од 19-от и почетокот на 20-от век, го привлече вниманието на домашната и странската музичка јавност со својот професионален, но отворен и флексибилен однос кон музиката, обидувајќи се да ги усогласи конфликтите во традиционалниот и модерниот пристап на конкуренцијата меѓу уметниците од сите возрасти, училишта и интереси.
Во категорија со голема конкуренција настапија учениците на Државното музичко училиште од Битола: Димитриј Стојчевски – ученик во 2 година – кој освои 1 награда и Анастасија Петреска-ученичка во 2 година – освои 2 награда .
Анастасија изведе дела од Јозеф Хајдн и Михаил Глинка, а Димитар од Лудвиг Ван Бетовен, Фредерик Шопен и Франц Лист. Двајцата се ученици кај професорката Татјана Божиновска. Повеќе од 8.500 натпреварувачи од Србија и странство (Словенија, Италија, Швајцарија, Македонија, Босна и Херцеговина, Хрватска, Австрија, Франција, Украина, Русија, Бугарија, Словачка, Унгарија, Црна Гора, ОАЕ…) во претходните години учествувале на натпреварот.