Со поените на Стојан Ѓуроски, на девет секунди пред крајот на натпреварот, кошаркарите на МКК Куманово дојдоа до минимална победа против Гостивар (75:73) во рамките од првото коло во плеј-аут фазата во „МТЕЛ“ Супер лигата.

Наместо мирна завршница, МКК Куманово влезе во драматична завршница на средбата со Гостивар, прв од Плеј-аут сегментот за двете екипи. Двоцифреното водство, кое го имаа по три одиграни четвртини (60:50), не се покажа како доволно за мирен финиш. Напротив, Гостивар успеа да го анулира, дури и да поведе, и во последните две минути да има шанса и да победи во Куманово.

Во драматичната завршница, Стевановиќ загуби една топка по која Димитриевски положи за 73:73. Во оние 14 секунди до крајот, репрезентативецот Ѓуроски положи за водство на МКК Куманово (75:73), но крајот беше далеку. Во последниот напад, и добро организирана акција на гостиварци, Столески имаше отворена позиција, но не успеа со тројка, пред звукот на сирената, да му донесе победа на Гостивар, и ги остави надежите во битката за опстанок нешто поголеми.

Двата бода, тешко освоени, одат на контото на екипата од Куманово за скор (11-12), многу поголем и веќе недостижен за Гостивар (6-17). Луковиќ беше на нивото на задачата во овие 40 минути. Го заврши искусниот центар мечот со ефект од 27 поени и 14 скока, додека Стевановиќ додаде 13 поени (плус осум асистенции и пет скока).

На спротивната страна, Димитриевски реализираше 16 поени (плус девет скока и три додавања), Младеновиќ имаше поен помалку и шест асистенции, Црниќ додаде 11, а Американецот Грегори уште 10 поени.

МТЕЛ“ СУПЕР ЛИГА-МАЖИ

ПЛЕЈ-АУТ

РЕЗУЛТАТИ И ДВОЈКИ 1. КОЛО

Чаир 2030 – Ангели 91:69

МКК Куманово – Гостивар 75:73

11.АПРИЛ (САБОТА)

18.00: Работнички – Феникс 2010

ТАБЕЛА

1.Чаир 2030 23 12 11 1870:1927 35

2.МКК Куманово 23 11 12 1863:1828 34

3.Работнички 22 9 13 1829:1792 31

4.Феникс 2010 22 8 14 1721:1778 30

5.Гостивар 23 6 17 1707:1836 29

6.Ангели 23 1 22 1505:2022 24