Мистериозната мисија: Слета американскиот вселенски авион, останувајќи во орбитата рекордни 908 дена
Вселенскиот авион „X-37B“ го надмина претходниот рекорд за времетраење на еден лет, останувајќи во орбитата дури 908 дена. Леталото со кое управува Вселенските сили на Соединетите Американски Држави (УССФ), е класифициран проект, па затоа се објавени малку информации за неговата намена или мисија.
Но, официјалните лица велат дека последниот лет, лансиран во мај 2020 година, извршил голем број научни експерименти. „X-37 Orbital Test Vehicle“ најпрво ѝ припадна на НАСА, но моделот подоцна беше предаден на американската армија, која ја создаде варијантата „X-37B“, пишува Њу Сајентист.
„X-37B“ за прв пат полета во орбитата во 2010 година. Досега се конструирани две такви ракети кои вршеле долготрајни летови; вклучително и мисија која траеше 674 дена и заврши во 2014 година. Леталото беше конструирано од Боинг и наликува на минијатурен вселенски шатл, а функционира на сличен начин.
Разликата е во тоа што „X-37B“ нема човечки екипаж, туку се контролира со далечински управувач од Земјата. Се лансира вертикално на ракетите Атлас 5 или Фалкон 9. Поминува долги периоди во орбитата, на надморска височина од околу 400 километри, а потоа слетува како традиционално вселенско летало. За време на летот во орбитата, користи соларни панели за собирање енергија.
Последната мисија, позната како ОТВ-6, заврши на 12 ноември кога „X-37B“ слета во вселенскиот центар Кенеди на НАСА. Надлежните наведуваат дека за време на мисијата биле спроведени голем број научни експерименти, вклучително и тест дизајниран од американската поморска истражувачка лабораторија, во кој сончевата енергија се собирала од соларни панели и се емитувала на Земјата во форма на микробранови.