Во последното 22 коло од регуларниот дел од македонската „МТЕЛ“ кошаркарска Супер лига, екипата на Работнички го совлада МКК Куманово во салата „Лазар Лечиќ“ со 76:72.

Клубот со најмногу титули, вкупно 15, во домашниот шампионат, Работнички, ќе ја продолжи сезоната во плеј-аут натпреварувањето преку кое ќе се обиде да остане во елитата.

Играчите предводени од тренерот Владимир Мирковски својот нов меч ќе го имаат на 11 април на домашен терен против Феникс 2010.

– Овие кошаркари се хероите на Работнички. Како што одамна е кажано — на мака се препознаваат јунаците. Како шеф на стручниот штаб, сакам да упатам искрени честитки до моите кошаркари и до целиот стручен штаб за прикажаната борбеност, карактер и пожртвуваност. Претходниот викенд несреќно загубивме од освојувачот на Купот, но веќе вчера успеавме да го совладаме вицешампионот и да покажеме дека овој тим има квалитет, дух и победнички менталитет. Голема благодарност и до Сити Парк Бојс за силната поддршка — вашата енергија и верба многу значат за тимот – се зборовите на Мирковски.