Селекторот на македонската А репрезентација, Благоја Милевски вели дека неговата селекција не е сè уште на нивото на Италија, но има причина да верува дека може да победи во овој полуфинлен плеј-оф натпревар од баражот за пласман на Мундијалот во Катар в четврток во Палермо.

Победникот од овој меч на 29 март на гостински терен ќе игра против Португалија или Турција. Македонија и Италија досега двапати се сретнале во официјални натпревари, повеќе прочитајте ТУКА

Милевски ја презеде функцијата во август 2021 година, по трите порази на Евро 2020, а досега со сениорите забележа три победи, три нерешени и само еден пораз, 0:4 дома од Германија во октомври 2021 година.

Елиф Елмас поради жолти картони е суспендиран, но играчот од средниот ред на Наполи наводно им дава совети на Милевски и соиграчите како да се подготват за „аѕурите“.

– Подготвени сме, не сме тука случајно и очекуваме да прикажеме одличен настап. Сè уште не сме на нивото на Италија, но ќе направиме сè што можеме утре за да бидеме подобри. Ќе им кажам на моите играчи да излезат на теренот и да уживаат. Атмосферата е одлична, ќе го дадеме максимумот да направиме позитивен резултат – рече Милевски на прес конференцијата.

Во овој меч веројатно повеќе од сите останати ќе ужива Александар Трајковски, кој играше за Палермо од 2015 до 2019 година.

– Тој ќе се чувствува многу како дома овде. Не го повикав Илија Несторовски од Удинезе бидејќи не е во најдобра физичка форма – вели Милевски.