Во последното издание на емисијата „Бизнис 21“, стопанственикот Горан Рафајловски даде своја анализа за работата на актуелната влада и за економските политики во државата.

Рафајловски, кој по подолга пауза од јавноста гостуваше во емисијата на ТВ „21“, оцени дека кај премиерот Христијан Мицкоски препознава „силна и искрена желба за напредок на државата“, но истовремено изрази сериозен сомнеж во капацитетот на владините кадри.

Според него, главниот проблем е што визијата на премиерот не се реализира соодветно на терен.

„Желбата на премиерот е извонредна, но тимот кој го избрал или не ја извршува работата како што треба, или нема доволно познавања за да ја реализира“, посочи Рафајловски.

Тој смета дека не е доволно некој само да биде поставен за министер, туку секој функционер мора да има јасен план и конкретни цели уште од првиот ден.

Рафајловски повика и на напуштање на, како што рече, „гломазните партиски програми“ и фокусирање на реални и остварливи проекти што ќе донесат конкретни резултати за граѓаните. Воедно, тој позитивно ја оцени мерката за доделување 250 милиони евра државна поддршка за домашното стопанство, нарекувајќи ја „одличен потег“.

Од друга страна, Рафајловски рече дека „не му се допаѓа“ мерката за намалување на ДДВ и акцизите на горивата, оценувајќи дека таквите мерки не се долгорочно решение.

Посебно внимание привлече и неговиот став за платите на функционерите. Според него, доколку државата сака да ја намали корупцијата и да привлече квалитетни професионалци, министерските месечни плати не би требало да бидат под 10.000 евра.

Просечната мартовска плата е 48.433 денари, инфлацијата изела 5,1 процент од растот