Во моментот заседава врвот на структурите во Министерството за внатрешни работи, идентификувани се 20-на лица за кои постои основано сомнение дека стојат зад подметнувањето на пожарите, рече премиерот Христијан Мицкоски за време на денешната посета на општината Јагуновце.

Тој додаде дека имале дојави кои изминатите денови ги собирале и дека во координирана акција МВР и Министерството за животна средина ќе постапуваат во следните денови.

„Видовте утрово се појави јасна снимка како се случува подметнување пожар во објект кој што изби утрово во 4.30 часот. Бев континуирано на линија и со градоначалникот на општина Кисела Вода и со министерот и со луѓето од противпожарната единица на град Скопје. Видовте како дрско се подметнува пожар, и тоа е само еден доказ за тоа што го зборувам цело време дека за жал постојат центри на моќ кои се обидуваат да внесат страв, паника кај граѓаните пред изборите и одговорот на прашањето кому тоа му одговара мислам дека со една мала анализа ќе го добиете самите ако ја направите“ им рече Мицкоски на новинарите.

Според него, има структури кои на ваков начин се обидуваат да внесат нестабилност и немир.

„Но, како што реков, тие ќе лешинарат, ќе подметнуваат, ние чесно ќе работиме, ќе се бориме и на крај повторно ќе победиме“ порача Мицкоски.