Мекинро: Новак ќе биде „лошо момче“ до крајот на кариерата
Легендарниот американски тенисер смета дека дисквалификацијата од УС Опен ќе биде „дамка“ која Новак Ѓоковиќ никогаш нема да успее да ја избрише.
Најдобриот тенисер на светот е дисквалификуван од УС Опен откако го погоди линискиот судија со топче. Ѓоковиќ во 11. гем од првиот сет претрпе брејк по што го удри топчето кое ја погоди жената зад него.
– Новак попушти под притисокот. Многу работи се случуваа надвор од теренот и очигледно е дека сето тоа влијаеше на него. Сега без разлика дали ќе му се допаѓа тоа или не, ќе биде лошо момче со крајот на кариерата – изјави Мекинро.
Легендарниот американски тенисер кој во 1990 година беше дисквалификуван од Австралија Опен поради недолично однесување кон судијата смета дека Ѓоковиќ мора да најде начин да го остави овој инцидент зад него.
– Може да го стори тоа. Новак брка историја, сака да ги помине Рожер и Рафа по бројот на освоени грен слем титули. Многу работи одат во негова корист, но ова е дамка која немада може да ја избрише. Сега треба да видиме како ќе се носи со ова, какви ќе бидат реакциите на останатите тенисери, како ќе реагираат навивачите.
Мекинро исто така смета дека Ѓоковиќ мораше да се појави на прес конференцијата.
– Требаше да се појави. Во минатото секогаш ја преземаше одговорноста, но сега ја влоши ситуацијата. Тоа што се извини преку Твитер додека беше на пат кон аеродромот не е доволно – додава Мекинро.
