Меѓународниот кривичен суд во Хаг издаде налози за апсење на двајца високи лидери на Талибанците во Авганистан.

Налозите, како што објави Ројтерс, се однесуваат на врховниот духовен водач на Талибанците, Хибатула Ахунџада, и на Абдул Хаким Хакани, кој раководи со судскиот систем во Авганистан.

Тие се обвинети за злосторства против човештвото – конкретно за прогон на жените и девојчињата врз основа на пол, родов идентитет и нивниот начин на изразување.

Според Меѓународниот кривичен суд, постојат разумни основи да се верува дека двајцата талибански функционери спровеле системски прогон врз лица кои не се придржувале кон строгите родови политики на талибанскиот режим, особено жени и девојчиња.

Ваквата постапка претставува еден од ретките случаи каде што Меѓународниот кривичен суд издава налози против високи функционери за злосторства поврзани со родова дискриминација.