Националниот џез-оркестар на 30 април во Скопје по десетти пат го организира фестивалот „Today it’s all about jazz“, по повод Меѓународниот ден на џезот.

Поради најавените неповолни временски услови, фестивалот е преместен од Парк „Ибни Пајко“ во објектот на Македонската филхармонија. Влезот е слободен.

Програмата на настанот содржи пет концерти кои ќе се одржат во малата и во големата сала на Филхармонија. Почетокот е закажан во 16 часот со настап на групата „Пич вајз“. Потоа ќе следува концертот на „Некст ту сајленс“ (во 17:15) и Арнау Гарофе со проектот „Франтик зен“ во 18:30 во малата сала на Филхармонија.

Вечерната програма ќе почне во 19:45 во големата сала со концертот „Џеко ливс“ на Националниот џез-оркестар и Дејн Олдерсон под диригентската палка на Зиги Фајгл, додека во 21 часот е најавен концерт на легендарната македонска група „Леб и сол“.

Претходно, во рамки на фестивалот се одржа и едукативна програма за деца со наслов „Џез фор кидс“. Работилницата се реализираше во соработка со Општина Кисела Вода и беше наменета за деца и ученици кои преку игра, импровизација и музика можеа да се запознаат со светот на џезот.

Меѓународниот ден на џезот е прогласен од УНЕСКО во 2011 година, по иницијатива на Херби Хенкок, и се одбележува во повеќе од 190 земји. Настанот во Скопје е поддржан од Халкбанк АД Скопје и „Скопско“.