Итната медицинска помош ќе добие 22 нови возила, од кои седум се донација од Европската Унија, а ќе бидат промовирани во првите недели од јануари. Министерот за здравство Фатмир Меџити најави и вработувања во здравството.

Новите вработувања ќе се реализираат од јануари, најмногу за медицински сестри, но и во брзата помош, секаде каде што има дефицит.

– Еден голем број од нив ќе вклопиме во овие вработувања во месец јануари. После тоа, нема да ни требаат согласности од Финансии и како Министерство ќе почнеме со нова систематизација низ целата држава, таму каде што има потреба, ќе ги вклучиме овие готови кадри, многу битни за македонското здравство, рече Меџити.

Министерот рече дека при изборот на нови кадри, ќе се бираат најдобрите.

Тој соопшти дека првите десет лекови од новиот двоцифрен број на лекови на позитивна листа, што ги користат пациентите со хронични болести, ќе бидат вклучени некаде во првите недели на јануари. Со тоа, нагласи, ќе се ревидира таа листа што не е ревидирана над 13 години.

Запрашан за рендген апарат во дефект во Градска, тој одговори дека веднаш ќе биде проверено и ќе биде информирана јавноста.