Една саботна вечер минатиот декември, Питер и Лиза Маршал седеле на каучот и ја гледале омилената телевизиска емисија. Питер тогаш ја погледнал Лиза и ја прашал дали ќе се омажи за него. Но, тие веќе биле во брак, а Питeр не се сеќавал на тоа.

Си-ен-ен пишува дека тој започнал да ја губи меморијата пред три години, а по бројните тестирања, му била дијагностицирана Алцхајмерова болест. Не можел да се сети дури ниту на моментите од неговата романса со Лиза. Заборавил кога првпат се сретнале, се држеле за раце и се бакнале. Тој дури не се сеќава ни на нивната венчавка.

– Создадовме нови сеќавања, но ме боли кога ќе го прашам дали се сеќава на нешто од порано, бидејќи не може да се присети – изјавила Лиза за Си-ен-ен. Но, рекла дека многу ја трогнало тоа што нејзиниот сопруг повторно ја запросил.

– Тој двапати се вљуби во мене, се чувствував почестено, како принцеза. Јас сум најсреќната на светот – додала Лиза.

Тие на крајот ги обновиле брачните завети. Лиза не сакала да ја пропушти можноста со сопругот да создаде уште еден спомен.

Лиза и Питер се венчале на 26 април годинава.

– Влегов во тоа без никакви очекувања. Питер беше добро цел ден, беше многу среќен. Во текот на разменувањето на заветите ми рече дека ме сака, а тоа беше сѐ што ми требаше – заклучила Лиза за Си-ен-ен.