Денес во Штип чекорат семејствата и најблиските на нивните деца и најмили – оние што останаа со најтешката болка, но и со најголемата обврска да се борат за вистината и правдата, порачаа семејствата на загинатите во пожарот во дискотеката „Пулс“ од маршот во Штип.

-Во рацете ги носиме нивните фотографии, затоа што сакаме сите да ги видат лицата, насмевките и животите за кои повеќе од една година бараме одговори. Ова не е само марш на тага и барање -правда. Ова е марш на љубов, достоинство и непокорна истрајност. Чекориме затоа што не прифаќаме молк. Чекориме затоа што нашите деца заслужуваат вистинска правда. Чекориме затоа што вистината мора да излезе на виделина и одговорност мора да има, ќе продолжиме да чекориме сè додека правдата не стигне, сè додека вистината не биде кажана и сè додека нашите ангели не го добијат мирот што го заслужуваат- рече Наталија Таневска мајка на починатиот Дамјан Таневски од Штип.

Родителите, семејствата, пријателите, другарите на загинатите поминаа пред зградата на Основниот и Апелацискиот суд и на Јавното обвинителство во Штип, а пред зградата на Секторот за внатрешни работи-Штип, се обрати Александар Наунов татко на загинатата Надица Наунов. Во говорот порача дека семејства бараат одговорност за секое непостапување, за секое одолговлекување и за секој молк што, како што вели придонесе ова да заврши со човечки жртви.

– Денес стоиме пред МВР Штип за да го поставиме прашањето за кое сите долго време чекаме одговор: Кој кого штитеше и зошто не се постапуваше навреме?, праша тој.

Според обвинителниот акт, Планот за акциска контрола за „Пулс“ не бил потпишан и одобрен навремено, а не биле преземени мерки што можеле да спречат трагедија. Денес јавно прашуваме: Зошто се одолговлекувало? Кој дозволил да се чека? Кој премолчел? Кој не постапил? Требаше ли ова да заврши со 63 човечки жртви и стотици повредени за институциите конечно да се разбудат? Требаше ли да изгубиме 63 деца, браќа, сестри, сопрузи, родители и пријатели за некој да сфати дека пропустите убиваат? Многу работи допрва ќе излезат на виделина, но за жал- предоцна-рече Наунов.

Семејствата прашаа до каде е постапката за инспекторите на УЈП и кој ќе одговара и кога. Од Здружението на граѓани 16 март 2025 година најавија дека Маршеви на ангелите ќе имаат во Кочани, но и во останатите градови, каде што има загинати во „Пулс“.