Раководството на Манчестер Јунајтед би можело веќе во текот на оваа недела да го реши тренерското прашање за следната сезона, а според англиските медиуми, главен кандидат за постојано решение е сегашниот предводник Мајкл Керик.

Како што пренесува „Атлетик“, извршниот директор Омар Берада и спортскиот директор Џејсон Вилкокс планираат на состанокот на управата да го предложат Керик за нов шеф на стручниот штаб. Последниот збор, сепак, ќе го има косопственикот на клубот Џим Ретклиф, кој во моментов ги носи главните одлуки во спортскиот сектор.

Иако официјална потврда сè уште нема, сè погласни се најавите дека поранешниот играч од средниот ред на Јунајтед ќе остане на клупата и следната сезона. Во клубот веќе го вклучиле во разговорите околу летниот преоден рок и планирањето на тимот.

Керик ја презеде екипата во јануари како привремено решение по заминувањето на Рубен Аморим, во период кога Јунајтед се наоѓаше на седмото место во Премиер лигата. Оттогаш тимот бележи значителен напредок и моментно е на третата позиција, со обезбедено место во Лигата на шампионите.

Во Манчестер разгледувале и други тренерски опции, меѓу кои биле Андони Ираола и Унаи Емери, а биле направени и дополнителни проверки за уште неколку кандидати. Сепак, резултатите што Керик ги оствари за краток период му донеле сериозна предност во трката за тренерската функција.

Важен фактор во одлуката е и претстојниот преоден рок, бидејќи во клубот сметаат дека е клучно што поскоро да биде познато кој ќе го води тимот во новата сезона, особено поради преговорите со потенцијалните засилувања.

ВИДЕО | Македонец тргна да се тепа со грчки судија — доби суспензија од 17 натпревари

ВИДЕО | Aрапи се тепаа со палки на дербито во Саудиска Арабија

УЕФА го казни Фенербахче со десет милиони евра, сомнителен бил договорот со Мурињо