Францускиот претседател Емануел Макрон денес изјави дека САД повеќе нема да ја штитат Европа на долг рок и дека затоа Европа треба да биде посилна, пренесуваат медиумите.

„Предизвикот за нашата Европа е да биде посилна и понезависна, бидејќи ги имаме САД, кои повеќе нема да нè штитат на долг рок“, рече Макрон за време на разговор со ученици во француско-кипарско училиште во Никозија, каде што присуствуваше на неформален самит на лидерите на Европската Унија.

Макрон како примери го наведе прашањето за Гренланд, како и ситуациите во Иран и Украина.

Францускиот претседател додаде дека САД се сојузник на Европа, но Стариот континент е „изграден врз идејата“ дека Американците ќе го штитат засекогаш. Макрон се заложи за европски суверенитет во областа на одбраната.