Македонските тенисери во денешниот дуел од второто коло од Третата Европска група од Дејвис купот стигнаа до првата победа откако Калин Ивановски и Олег Приходко ги добија двата сингл меча. Македонија води со 2:0 во мечот и останува да се игра уште мечот во двојки, но добро е да се оствари максимален триумф.

Во првиот меч, кој беше и во прекин поради дожд во вториот сет Калин Ивановски го совлада Дони Гаши со 2:0 во сетови (7:5, 6:4). На тој начин Ивановски ја оствари и втората победа откако вчера го донесе единствениот поен за Македонија во мечот со Молдавија.

Во вториот меч Приходко беше убедлив против Јасин Јакупи и го совлада со 2:0 во сетови, притоа загуби само два гема во мечот (6:1, 6:1). Да се надеваме дека здравствените проблеми за Приходко и проблемите со грчеви од вчера се надминати.

Во мечот во двојки за македонскиот тим се пријавени Ивановски и Приходко, додека за Косово на теренот треба да се појават Гранит Бајралиу и Салидин Рама. Сепак селекторот Горан Шевченко може да направи и промени во тимот за овој меч.

Во вториот меч од групата Молдавија води против Грузија со 2:0 со што го обезбеди и првото место во групата и промоција во Втората Светска група бидејќи утре ќе игра против аутсајдерот Косово.

Македонија утре ќе игра против Грузија, директен дуел за второто место во групата.

Во групата А Летонија поведе со 2:0 против Црна Гора, додека Република Ирска го победи Азербејџан (2:0).