Денеска македонската машка кадетска репрезентација во својот прв натпревар на Светското училишно првенство во ракомет што се одржува во Скопје, во салата „Македонско сонце“ триумфираше над Бугарија убедливо со 33:18.

Нашата селекција целосно го скрши отпорот на ривалот во вториот дел, откако по првото полувреме имаше само два гола разлика (11:9).

Најефикасен во репрезентацијата на Македонија беше Лука Јовиќ со шест погодоци. Следен противник на ракометарите предводени од Горан Кузманоски ќе биде Грузија в четврток од 08.30 часот.

Успешно стартуваше и македонската женска кадетска репрезентација предводена од Даниела Новеска со победа над Белгија од 34:12.

Сите дилеми околу победникот беа решени веќе по првото полувреме кога нашата селекција имаше предност од 17:6.

Прв стрелец за македонската репрезентација беше Ивана Трифуновска со пет гола. Следен противник на Македонија ќе биде Грузија в четврток од 10.30 часот во салата „Крсте Мисирков“ во Гази Баба.