Најдобрата македонска машка сениорска ракометна репрезентација ја искористи ЕХФ неделата за одигрување на пријателски натпревар против селекцијата на Австрија.

Денеска избраниците на селекторот Кирил Лазаров во Брегенц одигра реми против Австријците со резултат 30:30.

По првото полувреме ниту една од двете репрезентации немаше предност (15:15).

Нашите најдобри ракометари во текот на мечот имаа и позитива од „плус четири“ (25:21), но не успеаја истата да ја задржат.

Во самиот финиш од дуелот, Австрија направи пресврт и дојде до ново водство, но успеаја македонските ракометари да го избегнат поразот со голот на Кузмановски кој беше прецизен од седмерец.

Токму играчот на Еурофарм Пелистер, Филип Кузмановски беше најефикасен во нашата репрезентација со 10 голови, а пет имаше Марко Митев.