На иницијатива на територијалниот дистрибутер „Smith+Nephew“, еден од водечките светски брендови во ортопедијата, препознатлив по своите иновации, врвен квалитет и современи хируршки решенија, овој викенд во Скопје успешно беше одржана едукација посветена на најновите технологии и на роботската навигација во хирургијата на коленото. Целта на настанот беше унапредување на постоечките хируршко ортопедски техники и подобрување на резултатите кај пациентите.

Едукативниот процес го водеа реномирани експерти од областа на ортопедијата: д-р Саша Стојановиќ од Универзитетскиот клинички центар во Ниш, Република Србија, д-р Александрос Елефтеропулос од Општата болница во Науса, Грција, и д-р Миљана Милутиновиќ од Здравствениот центар Алексинац, Република Србија. На обуката присуствуваа домашни ортопеди хирурзи кои се стекнаа со значителни знаења во примена на новите техники и процедури во ортопедијата.

Фокусот на едукацијата беше насочен кон современите хируршки техники и дигиталните решенија што го унапредуваат планирањето и изведбата на операциите на коленото. Посебен акцент беше ставен на примената на роботската навигација, која овозможува поголема прецизност при поставувањето на имплантите, подобра продуктивност на хируршките процедури и индивидуализиран пристап кон секој пациент.

Присутните домашни специјалисти ортопеди имаа можност да се запознаат со најновите светски трендови, клинички искуства и придобивките од интеграцијата на напредните технологии во секојдневната ортопедска практика. Преку интерактивни дискусии и размена на експертски знаења беа претставени современи концепти кои придонесуваат за подобри хируршки резултати и побрзо функционално закрепнување на пациентите.