Белорускиот претседател Александар Лукашенко потпиша декрет со кој се помилуваат 22 лица – 15 жени и 7 мажи – „како што се приближува Новата година “, се вели во соопштението на претседателството објавено денеска, пренесено од Ројтерс.

Меѓу нив, 20 биле „осудени за злосторства од екстремистичка природа“, термин што се користи за активисти осудени за спротивставување на претседателот, кој е на власт од 1994 година.

Лукашенко, 71, потисна многу протести, вклучувајќи ја и најголемата народна мобилизација во 2020 и 2021 година, кога десетици илјади Белоруси демонстрираа против неговиот реизбор, што се сметаше за производ на изборна измама.

Претседателското помилување беше дадено од „хуманитарни причини и во интерес на семејствата“, според претседателството, кое не ги објави имињата на лицата.

Американскиот претседател Доналд Трамп ја повикува Белорусија да ослободи политички затвореници во замена за укинување или ублажување на санкциите на САД.

Така, повеќе од 100 затвореници беа ослободени во декември и веднаш префрлени во Украина и Литванија, вклучувајќи го и активистот Алеш Бјалијатски, еден од добитниците на Нобеловата награда за мир за 2022 година, и опозициските личности Марија Колесникова и Виктор Бабарико.

Според белоруската невладина организација за човекови права „Вијасна“ , земјата продолжува да брои повеќе од илјада политички затвореници, вклучувајќи го и опозицискиот лидер Микола Статкевич, кој беше ослободен во септември, но се врати во затвор откако одби да ја напушти земјата.

ВИДЕО | Белорусија распоредува ракети „oрешник“ низ својата територија