Поради високите цени на керозинот и укинувањето на регионалната подружница Ситилајн, германската авиокомпанија „Луфтханза“ значително го редуцира својот летен распоред. До октомври ќе бидат откажани вкупно 20.000 летови на кратки релации, а мерката ќе влијае на голем број европски дестинации.

Од компанијата соопштија дека ова ќе резултира со заштеда од околу 40.000 тони керозин, чија цена, според  „Луфтханза“,се удвоила од почетокот на војната со Иран. Информацијата беше објавена од  седиштето на групацијата во Франкфурт.

Оптимизација преку шесте главни аеродромски центри

Со новите корекции, „Луфтханза“ има за цел да го намали бројот на економски неисплатливи кратки летови. Летната понуда ќе се оптимизира преку шесте главни хабови на групацијата:

Франкфурт, Минхен, Цирих, Виена, Брисел и Рим.

Од компанијата потенцираат дека, и покрај намалувањата, патниците ќе продолжат да имаат пристап до глобалната мрежа на дестинации преку овие аеродроми.

Промени на бројни европски линии

Првите 120 дневни откажувања на летови, кои ќе важат до крајот на мај, беа спроведени во понеделникот. „Луфтханза“ информира дека сите засегнати патници веќе се навремено известени.

Привремено се укинуваат линиите од Франкфурт до Бидгошч и Жешов во Полска, како и до Ставангер во Норвешка. Дополнително, десет авиорелации во рамките на групацијата ќе се пренасочат преку други аеродроми. Станува збор за следните дестинации: Херингсдорф, Корк (Ирска), Гдањск (Полска), Љубљана (Словенија), Риека (Хрватска), Сибиу (Романија), Штутгарт, Трондхајм (Норвешка), Тиват (Црна Гора), Вроцлав (Полска).

Најави за дополнителни промени

Поради намалувањето на капацитетите, „Луфтханза“ ја ревидира и среднорочната стратегија за рути. Деталите за идниот распоред се очекува да бидат соопштени кон крајот на април или почетокот на мај.

За летовите вклучени во актуелниот летен ред, од „Луфтханза“ очекуваат „во голема мера стабилно снабдување со гориво“, и покрај турбуленциите на енергетските пазари.

Извор: DW